ДУШАНБЕ, 25 янв — Sputnik. Лидери варзиши сабуки Тоҷикистон Дилшод Назаров дар асоси холҳои ба даст оварда, дар барномаи IAAF Hammer Throw Challenge дар рӯйхати ҷаҳонии гурзандозхон дуюм шуд.
Дилшод Назаров дар Юджини Амрико дар мусобиқаи "Diamond League Meetings" иштирок намуда, гурзро ба масофаи 78,12 м ҳаво дод. Ҳамчунин дар шаҳри Острави Чехия низ дар сабқати "55th Ostrava Golden Spike" ҳунарнамоӣ карда, натиҷаи 78,82-ро ба даст овард. Дар ҳар ду мусобиқа ҳам варзишгар соҳиби мудалҳои нуқра шуд.
Дар баробари ин Назаров дар мусобиқаи "62nd Janusz Kusocinski Memorial", ки дар Полша доир гардид, иштирок кард. Варзишгари тоқик гурзро ба масофаи 77,20 метр ҳаво дода, соҳиби нишони биринҷӣ гардид. Дар мусобиқаи "Paavo Nurmi Games" бошад, Дилшод Назаров бо ба даст овардани 78,87 натиҷа соҳиби медали нуқра гардид.
Баромади панҷуми Назаров, Бозиҳои тобистонаи Рио-2016 шуд, ки дар он варзишгари тоҷик натиҷаи беҳтарин нишон дода, соҳиби медали тилло ва қаҳрамони ҷаҳон оид ба гурзандозӣ шуд.
Дар баробари ин Назаров дар сабқати дигар, ки дар Олмон баргузор гардид, гурзро ба масофаи 78,34 метр ҳаво дода, соҳиби медали нуқра шуд.
Ҷои аввал дар рейтинги беҳтарин гурзандозони ҷаҳонӣ, бо натиҷаи умумӣ (242.89 хол) насиби варзишгар аз Полша, Павел Файдек гардид. Мақоми сеюмро Войтсех Новитски бо (232.63 хол) ба худ ихтисос дод. Дар ҷои чорум Ашраф Элсефи (229.94 хол), аз Қатар қарор гирифта, панҷгонаи беҳтаринро Марсел Ломницкий (229.70 хол) варзишгар аз Словакия баст.
