ДУШАНБЕ, 9 ноя — Sputnik. Ҳайати воломақоми Русия таҳти роҳбарии муовини вазири вазорати корҳои хориҷии ФР Григорий Карасин ҷиҳати иштирок дар машваратҳои байниидоравии сиёсӣ миёни Тоҷикистон ва Русия ба Душанбе омад, хабар медиҳад хадамоти матбуоти вазорати корҳои хориҷии ҶТ.
"Зимни мулоқот ҷонибҳо рушди мунтазами муносибатҳои дуҷониба ва бисёрҷонибаро миёни Ҷумҳурии Тоҷикистон ва Федератсияи Русия бо қаноатмандӣ қайд карда, роҷеъ ба дурнамои самтҳои ҳамкориҳои мутақобилан судманд табодули афкор намуданд",-омадааст дар иттилоия.
Баъд аз мулоқот машваратҳои сиёсӣ оид ба мавзӯи дурнамои ҳамкориҳои дуҷониба ва вазъ дар Осиёи Марказӣ баргузор шуд. Ҳайати ҷониби Тоҷикистонро муовини вазири корҳои хориҷии Ҷумҳурии Тоҷикистон Маҳмадшариф Ҳақдод роҳбарӣ кард.
