ДУШАНБЕ, 29 сен — Sputnik. Ҳунарманди амрикоӣ Брэд Питт ихтиёран барои тафтиши машрубот ва маводи мухаддир аз таҳлили тиббӣ гузаштааст.
Пештар хабар дода шуд, ки ӯ дар вақти парвоз бо ҳамсараш Анҷелина Ҷолӣ ва фарзандонаш сахт асабӣ гашта, бо онҳо дағалона муносибат кардааст.
Бо супоридани таҳлилҳо, ҳунарманд хост нишон диҳад, ки вай ягон чизи пинҳон карданӣ надорад. Умуман ӯ мехоҳад ин масъаларо равшан намояд, то дар ин мавзӯъ ба муболиғаҳо роҳ надиҳанд, хабар медиҳад РИА Новости бо истинод ба портали иттилоотии TMZ.
Пештар маълум гардид, ки Анҷелина Ҷолӣ ҳуҷҷатҳояшро барои ҷудо шудан пешниҳод намудааст ва сабаби онро дар "якдигарнофаҳмӣ" нишон додааст. Ҳамчунин ҳунарпеша аз суд хоҳиш намудааст, ки 6 фарзанди онҳо бо вай монанд. Ба ҳамаи ин нигоҳ накарда Питт ҳуқуқи аз фарзандон хабар гирифтанро дорад ва ӯ васии қонунии онҳо боқӣ мемонад.
Бред Питт ва Анҷелина Ҷолӣ яке аз ҳунармандони гаронарзиши Ҳолливуд ба ҳисоб мераванд. Онҳо пас аз солҳои зиёди зиндагонӣ бо ҳам соли 2014 расман оила барпо карданд. То дер дар Ҳолливуд ин ду ҳунарманди серфарзандро ҷуфти намунавӣ мешумориданд. Дар умум ҳунармандон шаш фарзанд доранд ва онҳо фарзандхонӣ ҳам кардаанд.
