ДУШАНБЕ, 11 май — Sputnik. Аснои баргузории як амалиёти вижаи кормандони милитсия дар "Гулбутта" сокини 54-солаи маҳалла бо ду писараш дастгир гардиданд, менависад сомонаи расмии ВКД.
"Дар маҳаллаи Гулбуттаи шаҳри Душанбе се нафар сокини шаҳр, марди 54-сола бо писарони 20 ва 27-солааш, аз ҳиссиёти авбошӣ ҷавони 26-солаи сокини шаҳри Душанберо бе ягон асос лату кӯб намудаанд. Сипас яке аз гумонбаршудагон, яъне марди 27-сола бо корди дар дасташ буда, ду маротиба дар қисмати пойи ҷабрдида задааст",- меафзояд манбаъ.
Зимни гузаронидани чорабиниҳои оперативӣ-ҷустуҷӯӣ гумонбарони ҳодисаи мазкур аз ҷониби кормандони милитсия дастгир карда шуданд.
Айни замон дар нисбати дастгиршудагон бо иттиҳоми "авбошӣ" парвандаи ҷиноӣ боз гардида, тафтишот идома дорад.
