ДУШАНБЕ, 22 июн — Sputnik. Тоҷири бозори "Саховат"-и Душанбе Иброҳим Маҷидов миёни садҳо тоҷири бозорҳои пойтахти кишвар барои аввалин бор дар моҳи Рамазон қимати маҳсулоти худро аз 20 то 30 дар сад поин бурдааст, менависад Радиои Озодӣ.
"Барои моҳи Рамазон маҳсулотро арзон кардем. Ба дигарон кор надорем, аммо аз поин кардани нархҳо ҳеч зарар намебинем",- гуфтааст тоҷир.
Ба қавли ӯ, аз қабл барои моҳи Рамазон омодагӣ гирифта, барои фурӯш равған, биринҷ ва дигар навъи донагиҳо ворид кард, ки дар ин моҳ харидори бештар доранд. Ҳоло як кило донагӣ ва як литр равғани ин соҳибкор аз моли соҳибкорони дигар 2 сомонӣ фарқ дорад.
Боло рафтани нархи маҳсулоти ниёзи аввалия дар моҳи Рамазон ба як анъана табдил ёфтааст. Дар ин миён, иқдоми Иброҳим Маҷидов, ки бори аввал равғану биринҷро аз 20 то 30 дарсад арзон мефурӯшад, як иқдоми бесобиқа ҳаст.
