ДУШАНБЕ, 23 апр — Sputnik. Дар Душанбе ва Қӯрғон-теппа кормандони пулис дар як шабонарӯз беш аз 12 килограмм маводди мухаддиро ошкор ва забт карданд, хабар медиҳад ВКД Тоҷикистон.
Аз ҷумла, дар пойтахти кишвар ба иттиҳоми гардиши ғайриқонунии маводди мухаддир ҷавони 22 сола боздошт шуд, ки аз борхалтаи вай 2,5 килограмм ҳероини ошкор ва забт шуд.
Дар ҳамин рӯз маъмурони пулиси ноҳияи Восеъ аз як сокини 40 сола 2 килограмму 600 грамм ҳашишро ошкор карданд. Зикр мешавад, ки боздоштшуда қаблан барои дуздӣ муҷозот шуда буд.
"Бештар аз ҳама дар ин рӯз аз як сокини 58 солаи Қӯрғон-теппа мухаддирот ошкор шуд: ҳангоми кофтукоби шахсӣ аз борхалтаи вай 3 килограмму 870 грамм ҳашиш ва 3 килограмму 610 грамм нашъа мусодира шуд", — омадааст дар хабари ин ниҳод.
Аз рӯйи ин маворид парвандаҳои ҷиноӣ боз шуда таҳқиқи онҳо идома дорад.
