ДУШАНБЕ, 16 мар — Sputnik. Нерӯҳои амниятии Афғонистон аз имкони ҷилавгирӣ ва маҳви ҷангҷӯён дар сурати талоши онҳо ба самти марз бо Тоҷикистон бархурдор ҳастанд, изҳор дошт ба Радиои Озодӣ фармондеҳи нерӯҳои марзбонии ВКД Афғонистон Шафик Фазлӣ.
"Ҷангҷӯёни аз қаламрави Афғонистон бидуни ҳамоҳангсозӣ бо ҳамтоёни эҳтимолии худ дар Тоҷикистон қодир нестанд, ки ба марз бо Тоҷикистон ҳамла кунанд", — гуфт вай ва изофа кард, ки нигаронии СПАД дар мавриди нигарониаш аз марзҳо, онҳоро ошуфта накардааст.
Вай амалиёти панҷрӯзаи ниҳодҳои амниятии Афғонистон дар вулусволиҳои Имом Соҳиб ва Дашти Арчи вилояти Қундузро мисол овард, ки натоиҷи хубе дар пай дошт. Дар ин минтақа гурӯҳҳои мусаллаҳ маҳв карда шуданд.
Дар сурати пайдо шудани хатарот дар ҳифозати марзи миёни Тоҷикистону Афғонистон роҳандозии амалиёти муштараки ду кишвар дар назар гирифта шудааст, гуфт Фазли ва зикр кард, ки "феълан дар марзи миёни Афғонистон ва Тоҷикистон мушкиле вуҷуд надорад".
Дабири кулли СПАД Николай Бордюжа рӯзи 13 март дар Душанбе изҳор дошт, ки дар сурати вуқӯъи даргирӣ дар марзи Тоҷикистон бо Афғонистон, из созмон аз имкони интиқоли нерӯҳояш ба ин минтақа дар тӯли се рӯз бархурдор буда метавонад аз ҳар гуна таҳоҷум ҷилавгирӣ бикунад.
