ДУШАНБЕ, 23 апр - Sputnik. Гардиши мол байни Иттиҳодияи иқтисодии АвруОсиё (ИИАО) ва Созмони ҳамкории Шанхай (СҲШ) ба 386 миллиард доллар расидааст.
Дар ин бора Бахитҷон Сагинтаев, раиси Раёсати Комиссияи иқтисодии АвруОсиё (КИАО) хабар додааст.
Вай қайд кард, ки ин рақамҳо, ки барои соли 2025 пешниҳод шудаанд, сатҳи баланди ҳамкории байни созмонҳоро нишон медиҳанд.
Вай илова кард, ки тиҷорати мутақобила байни иттиҳодияҳо дар тӯли 10 соли охир чор маротиба афзоиш ёфтааст. Ҳамчунин саҳми кишварҳои СҲШ дар гардиши тиҷорати хориҷӣ ба 50% расидааст.
Сагинтаев таъкид кард, ки ҷонибҳо айни замон ташаббусҳои муштаракеро омода мекунанд, ки дар доираи ёддошти тафоҳум байни ИИАО ва Котиботи СҲШ, ки соли 2021 имзо шудааст, амалӣ карда мешаванд. Гуфта мешавад, ки ин санади ҳамкориҳои муштаракро танзим мекунад.
"Имзои нақшаи амали муштарак нишондиҳандаи гузариш ба сатҳи сифатан нави шарикӣ хоҳад буд. Мо метавонем аз ҳамкории чаҳорчӯбавӣ ба татбиқи амалии ташаббусҳои мушаххас гузарем", - гуфт ӯ.
Ғайр аз ин, ҷонибҳо изҳори итминон карданд, ки талошҳои муштараки минбаъдаи байни ИИАО ва СҲШ ба рушди иқтисодии кишварҳои узв мусоидат хоҳанд кард.
Ёдовар мешавем, ки Иттиҳоди иқтисодии Авруосиё (ИИАО) - созмонест, ки дар он Русия нақши барҷаста дорад ва ин созмон Қазоқистон, Қирғизистон, Белорус, Арманистон ва Русияро муттаҳид месозад.
Иттиҳоди иқтисодии АвруОсиё – ташкилоти байналмилалии иқтисодӣ буда, барои босамар пешравии ҷараёни иттифоқи гумрукӣ ва минтақаи озоди иқтисодӣ ва боз барои иҷрокунии дигар мақсадҳо ва вазифаҳое ки бо ҷараёни интегратсиони дар соҳаи иқтисодӣ ва башардӯстона вобаста мебошанд, таъсис шудааст.