ДУШАНБЕ, 16 апр – Sputnik. Қазоқистон созишномаи ҳампаймониро бо Тоҷикистон ба тасвиб расонд.
Дар ин бора хадамоти матбуоти Парлумони Қазоқистон хабар додааст.
Қайд карда мешавад, ки ин қадам ба рушди муколамаи сиёсии мутақобилан судманд байни кишварҳо ва ҳамкорӣ дар масъалаҳои амниятӣ мусоидат мекунад.
Тарафҳо ният доранд, тавассути тамринҳои низомӣ ва тақвияти иқтидорҳо ба чолишҳо ва таҳдидҳо дар Осиёи Марказӣ якҷоя мубориза баранд.
"Аз ҷумла, муносибатҳои иттифоқӣ бо Тоҷикистони бародар ба сатҳи сифатан нав расида мешавад", - изҳор дошт Маулен Ашимбоев, раиси парлумони Қазоқистон.
Ғайр аз ин, созишнома шарикии байни давлатҳоро дар бахши иқтисод, тиҷорат, кишоварзӣ, саноат, нақлиёт, инчунин фарҳанг, маориф ва як қатор соҳаҳои дигар дарбар мегирад.
Ғайр аз ин, санади тасдиқшуда имкониятҳои наверо барои ҳамкории Тоҷикистону Қазоқистон дар бахши тиҷорат фароҳам меорад.
Гуфта мешавад, ки дар ин санад муқаррароте мавҷуданд, ки ба соҳаи экологӣ таъсир мерасонанд.
"Истифодаи оқилона ва мутақобилан судманд ва ҳифзи захираҳои об дар Осиёи Марказӣ бо назардошти манфиатҳои ҳамаи кишварҳои минтақа, ҷанбаи муҳим рушди ҳамкорӣ мебошад", - гуфта мешавад дар созишнома.
Тоҷикистон ва Қазоқистон инчунин робитаҳои байнипарлумониро тавассути фаъолияти гурӯҳҳои дӯстии худ тақвият медиҳанд.
Қайд карда мешавад, ки ин созишнома ба рушди устувори муколамаи сиёсӣ байни кишварҳо мусоидат мекунад ва рушди мунтазами онҳоро таъмин мекунад.
Ёдовар мешавем, ки созишнома дар бораи ҳампаймонӣ аз ҷониби президентҳои Тоҷикистону Қазоқистон Эмомалӣ Раҳмон ва Қосим-Ҷомарт Тоқаев зимни музокироти дипломатӣ дар соли 2024 имзо шуда буд.