ДУШАНБЕ, 9 апр – Sputnik. Дар вилояти Суғди Тоҷикистон ҷаласаи машварати 9-уми минтақавии роҳбарони идораҳои сарҳадии давлатҳо - иштирокчиёни ИДМ бо ҳузури роҳбарону ҳайатҳои идораи сарҳадии Узбекистон, Беларус, Қазоқистон, Қирғизистон, Русия баргузор шуд.
Тавре дафтари матбуоти раиси вилояти Суғд хабар додааст, ҷаласаи мазкур дар шаҳри Гулистони вилояти Суғд баргузор гардид.
Машваратро муовини якуми Раиси КДАМ ҶТ — Фармондеҳи Қӯшунҳои сарҳадии КДАМ Тоҷикистон, генерал-лейтенант Раҷабзода Муродалӣ ифтитоҳ намуд.
© Foto / Пресс-служба председателя Согдийской области
Қайд карда шудааст, ки дар ҷараёни машварат иштирокчиён тадбирҳои андешидашавандаи идораҳои сарҳадии давлатҳо- иштирокчиёни ИДМ-ро барои муқовимат ба таҳдидҳои амнияти сарҳадӣ дар сарҳадҳои берунии давлатҳои минтақаи Осиёи Марказӣ баррасӣ намуданд.
Дар ин ҷаласа, дар бораи аҳамияти Барномаи ҳамкории давлатҳо- иштирокчиёни ИДМ барои таҳкими амнияти сарҳадӣ дар сарҳадҳои берунӣ барои солҳои 2026–2030 ҳамчун механизми амалии татбиқи сиёсати ҳамоҳангшудаи сарҳадӣ таъкид гардид.
Ҳамзамон дар ҷаласа, ба фаъолсозии иштироки мақомоти марзӣ дар татбиқи Барномаи байнидавлатии чораҳои муштараки мубориза бо ҷинояткорӣ барои солҳои 2024–2028 ва Барномаи ҳамкории давлатҳои узви ИДМ дар самти муқовимат ба терроризм ва ифротгароӣ барои солҳои 2026–2028 таваҷҷуҳи махсус зоҳир карда шуд.
Зикр карда шудааст, ки аз рӯйи натиҷаҳои ҷаласа маҷмӯи тадбирҳои амалӣ барои таъмини вазъи устувор дар сарҳадҳои берунии Иттиҳод таҳия гардид.