ДУШАНБЕ, 6 апр — Sputnik. Вазорати умури хориҷии Русия дар баёнияе эълом кардааст, ки Амрико ва мутаҳидони ғарбии он Имрон Хон, нахуствазири Покистонро зери фишор қарор доданд, иттилоъ додааст хабаргузории “Форс”.
Ғарб мехост, Имрон Хон сафари худ ба Русияро, ки дар моҳи феврал сурат гирифт, лағв кунад.
Дар идомаи ин баёния омдааст, дар остонаи сафари Имрон Хон ба Русия Доналд Лу, муовини вазири умури хориҷии Амрико дар умури ҷануби Осиё бо эҳзори сафири Покистон дар Вашингтон хостори лағви фаврии ин сафар шуда буд, ки рад шуд.
Вазорати умури хориҷии Русия афзуд, вазъияти пас аз сафари нахуствазири Покистон ба Русия нишон медиҳад, Амрико тасмим гирифтааст, Имрон Хонро ба далели нофармонӣ муҷозот кунад, бар ҳамин асос дархости адами эътимод ба нахуствазири ин кишвар ироа шуд.
Дар ин баёния ҳамзамон гуфта мешавад, ки ин як талоши шармовар аз сӯйи Амрико бар мудохила дар умури як кишвари мустақил ба манзури дастёбӣ ба аҳдофи худхоҳонаи худ аст.
Ёдовар мешавем, ки ахиран дар Покистон парлумон ва кобинаи ин кишвар мунҳал шуд.
Имрон Хон қаблан гуфта буд, мақомоти амрикоӣ ба вай ба хотири мавозеаш дар қиболи Русия ва ҷанги Украина ҳушдор дода ва ҳатто таҳдиди барканорӣ аз қудратро матраҳ кардаанд.
Имрон Хон бар асоси Қонуни Асосӣ то замони таъйини сарпараст ба симмати нахуствазирӣ идома хоҳад дод.