ДУШАНБЕ, 11 ноя — Sputnik. Дар ноҳияи Фархор зани 55-соларо келинаш бо ду зарби корд ба қатл расондааст, хабар медиҳад Вазорати умури дохилии Тоҷикистон.
Ба иттилои манбаъ, сокини 55-солаи ҷамоати деҳоти Дарқади ноҳияи Фархор дар манзили зисташ бо келини 31-солааш муноқиша намудааст.
Зимни муноқиша келини хонавода бо ду зарби корд хушдоманашро сахт маҷрӯҳ намуд. Манбаъ меафзояд, аснои ба бемористон интиқол додани зан ӯ ҷон додааст.
Ҳамчунин як ҳодисаи дигари куштор дар ноҳияи Бобоҷон Ғафуров сурат гирифтааст.
ВУД Тоҷикистон мегӯяд, марди 27-сола ҳамсари аз худ ду сол хурдашро барои суҳбат назди хоҷагии коммуналии шаҳраки Ғафурови ноҳияи мазкур даъват намуда, аз сабаби муноқишаи оилавӣ бо корд 13 маротиба ба аъзои бадани ӯ задааст.
"Ҷавонзани 25-сола дар ҷои ҳодиса ба ҳалокат расидааст", - омадааст дар хабари вазорат.
Пас аз қатли ҳамсараш мард се бори дигар ба бадани худаш корд задааст ва ҳоло ӯ дар бемористон қарор дорад.
ВУД Тоҷикистон мегӯяд, таҳқиқи ҳодисаҳои мазкур идома дорад.