Ҷанги шаҳрвандии Тоҷикистон ба ривояти тасвир

Ҳамоишҳои бисёррӯза дар соли 1992-юм дар майдонҳои Шаҳидону Озодӣ дар Душанбе баъдан ба хунрезиҳои ҷонибҳо печид.

Ҷанги шаҳрвандӣ дар Тоҷикистон солҳои 1992-1997 давом кард.

Дар ҷараёни ҷанги дохилӣ, ки баҳори соли 1992 миёни нерӯҳои исломию демократ аз як ҷониб ва "Фронти халқӣ" аз ҷониби дигар шурӯъ шуда панҷ сол идома кард, ҳудуди 150 ҳазор нафар кушта ва беш аз 1 миллион нафар муҳоҷир шуданд.

Талхиҳои ҷанги шаҳрвандии Тоҷикистон солҳои 1992-1997 аз даҳшаттарин рӯзҳо барои мардуми тоҷик ва кишвари Тоҷикистон дониста мешаванд.

Зарари иқтисодии ин ҷанг дар ҷумҳурӣ зиёда аз 10 млрд доллари амрикоӣ арзёбӣ шудааст.

Гуфтушунидҳо дар бораи созишномаи сулҳ алакай дар соли 1994 оғоз шуда буданд.

Барои истиқрори сулҳ дар Тоҷикистон аз ҷумла мақомдорони Русия талош мекарданд.

Бо гузашти ҷанд давр дар Алмато, Теҳрон, Ишқобод, Исломобод ва ахиран дар Маскав нерӯҳои мухолифин ва ҳукумат куллан ба мувофиқа расиданд.

Рӯзи 27- уми июни соли 1997 дар Кремли шаҳри Маскав дар нӯҳумин гуфтушуниди сулҳ дар Маскав Эмомалӣ Раҳмон - раисиҷумҳури Тоҷикистон ва Саид Абдуллоҳи Нурӣ, раҳбари Иттиҳоди нерӯҳои мухолифини тоҷик Созишномаи умумии истиқрори сулҳ ва ризоияти миллиро имзо карда, ба ҷанги панҷсолаи дохилӣ хотима доданд.

Инак даҳсолаҳост, ки 27- уми июн дар Тоҷикистон ҷашни Ваҳдати миллӣ бо шаҳомати хос ҷашн гирифта мешавад.