Дохили Масҷиди ҷомеи марказии Душанбе чӣ гуна аст? - акс

Дар маросими ифтитоҳ, раисҷумҳури Тоҷикистон, Эмомалӣ Раҳмон ва амири Қатар, Шайх Тамим бин Ҳамад Оли Сонӣ иштирок карданд.

Роҳбарони ду давлат ба сифати корҳои анҷомдодашуда, ки бо риояи суннатҳо ва нозукиҳои меъмории миллӣ иҷро шуда, таҷассумгари омезиши моҳиронаи арзишҳои миллӣ ва суннатҳои динӣ мебошанд, баҳои баланд доданд.

Масҷид дар ҳудуди 12 гектар, ки бинои масҷид дар 3 гектари он ҷойгир шудааст ва дорои 3 даромадгоҳи калон мебошад, бунёд гардидааст.

Санги асоси масҷид 5 октябри соли 2009 зимни бузургдошти асосгузор ва пешвои мазҳаби таҳаммулгарои ҳанафӣ - Абуҳанифа Нуъмон ибни Собит ва дар рӯзҳои таҷлили 1310-солагии ӯ гузошта шуд.

Масҷид имконияти ғунҷоиши 133 ҳазор намозгузорро дар як вақт дорад, ки аз ин шумора 43 ҳазор намозгузор дар дохили масҷид ва боқимонда дар гирду атрофи он ҷой мегирад.

Масоҳати ошёнаи якуми бино, дар маҷмуъ, наздики 18,5 ҳазор метри мураббаъро ташкил медиҳад. Дохили толорҳо бо 14 ҳазор метри мураббаъ қолини истеҳсоли ватанӣ қолинпӯш гардидаанд.

Масҷид гумбази зебову мунаққаши калон бо баландии 43 метр ва 17 гумбази хурд бо баландии 35 метр дорад.

Масҷид аз 4 манора бо баландии 74 метр, ду манораи хурди ороишӣ бо баландии 21 метр иборат мебошад.

Намои берунаи бинои иншоот беш аз 62 ҳазор метри мураббаъро ташкил дода, қариб 34 ҳазор метри мураббаъ бо мармари сафед оро ёфтааст.

Дар дохили масҷид 6 синфхонаи барҳаво, толори қабули меҳмонон ва гузаронидани мулоқоту вохӯриҳо, 2 китобхона, 9 ҳуҷраи корӣ, 3 меҳмонхона ва ҳуҷраҳои техникӣ ҷойгир шудааст.

Тарҳу усулҳои меъмории бостонии тоҷикӣ, зимни бунёду ороиши масҷид ба эътибор гирифта шудааст.