ДУШАНБЕ, 18 янв — Sputnik. Раисҷумҳури Тоҷикистон Эмомалӣ Раҳмон имрӯз аз Бонки миллӣ сар карда то Прокуратураи генералӣ тағйироти кадрӣ анҷом дод, хабар медиҳад котиботи президент.
Ба иттилои манбаъ, дар баробари ҷобаҷокунии кадрҳо дар Бонки миллӣ ва мақомотҳои ҳифзи ҳуқуқ, ҳамчунин мудири "Осорхонаи миллии Тоҷикистон" - ро аз вазифа озод кард.
"Шарифзода Абдувалӣ Қурбоналӣ бо сабаби ба кори дигар гузаштан аз вазифаи мудири муассисаи давлатии "Осорхонаи миллии Тоҷикистон" озод карда шавад", - таъкид мешавад дар хабар.
Зимнан, бо амри дигари Раҳмон, Ибодуллозода Аҳлиддин Ибодулло мудири ин муассиса таъйин шуд.
Илова бар ин, бо қарори роҳбари давлат Восидиён Фарҳод Саъдулло муовини Вазири рушди иқтисод ва савдо баргузида шуд.
