ДУШАНБЕ, 12 янв — Sputnik. Бино бар иттилои мақомоти шаҳри Хуҷанд, зимни боздид таваҷҷуҳ ба корандозии пурраи майдони истеҳсолот, ҷалби сармояи хориҷӣ ва дохилӣ, зиёд намудани ҷойҳои нави корӣ, насбу фаъол намудани дастгоҳҳои муосир, ба роҳ мондани истеҳсоли маҳсулоти воридотивазкунанда ва рақобатпазир, пешниҳоди нақшаи тиҷоратӣ ҷиҳати қабули фармоишоти давлатӣ ва ғайраҳо табодули назар карда шуд.
Шералӣ Кабир зимни боздид таъкид намудааст, ки Вазорати саноат ва технологияҳои нави Тоҷикистон Барномаи саноатикунонии босуръати ҷумҳурӣ ва якчанд барномаҳои рушди соҳаҳои мухталифи саноат, аз ҷумла рушди металлургияи ранга ва сиёҳ, саноати хӯрокворӣ, соҳаи мошинсозӣ, саноати сабук, соҳаҳои кирмакпарварӣ ва коркарди пилларо то давраи соли 2025 таҳия намудааст, ки айни замон мавриди амал қарор доранд.
Инчунин вай афзудааст, ки ин барномаҳо барои амалӣ намудани ҳадафи чоруми миллӣ-саноатикунонии босуръати мамлакат ва коҳиш додани шиддати омилҳои берунӣ ба иқтисодиёт равона гардидаанд.
“Ҳадафи пешниҳоди барномаҳои мазкур фароҳам овардани замина барои коркарди ашёи хоми маҳаллӣ, таъмини шуғли аҳолӣ, таҳияи омилҳои ҳавасмандгардонӣ барои ҷалби сармоягузориҳо, бунёди корхонаҳои нав, ташкили кластерҳои саноатӣ, ҷорӣ намудани технологияҳои инноватсионӣ дар истеҳсолот, роҳандозии истеҳсоли маҳсулоти нав, ташкили сарчашмаҳои нави андозбандӣ, муҳайё намудани ҷойҳои кории нав, тақвияти истеҳсолоти маҳсулоти рақобатпазири воридотивазкунандаю ба содирот нигаронидашуда ва зиёд намудани ҳаҷми содирот мебошад”, - қайд кардааст Шералӣ Кабир.
Вазири саноат зикр кардааст, ки дар ин самт бояд саноатчиёни шаҳри Хуҷанд иқдом намуда, барои рушди соҳа ҳиссагузорӣ намоянд.
