ДУШАНБЕ, 12 дек — Sputnik. Фарҳод Раҳимӣ, президенти Академияи миллии илмҳои Тоҷикистон ва узви Маҷлиси миллӣ гуфт, дар боби якуми санад мафҳумҳои асосӣ, суроғаи сомона ва пешбурди он бо се забон - тоҷикӣ, русӣ ва англисӣ пешбинӣ шудаст.
"Дар сомона ҳама гуна иттилооти пурра, дақиқ ва мубрам, бо дарназардошти талаботи Дастури Маҷлиси миллӣ ва дигар санадҳои меъёрии ҳуқуқӣ ҷойгир карда шуда, пешбурди он аз ҷониби Дастгоҳи Маҷлиси миллӣ таъмин карда мешавад",-афзуд Раҳимӣ.
Ӯ тавзеҳ дод, ки боби дуюм муқарраротро дар бораи сифати маълумоти иттилоотии дар сомона ҷойгиршаванда, ки бояд шаффофияти фаъолияти Маҷлиси миллиро таъмин намояд, дар бар гирифта, боби сеюм мушаххас муҳлати пешниҳод ва баррасии иттилоотро барои ҷойгир кардан дар сомона муайян мекунад. Таъкид шуд, ки боби чорум бошад, масъалаҳои марбут ба ҷойгиркунии иттилоот дар сомонаро бо дарҷи санаи он ва баҳисобгириву нигоҳдошти минбаъдаи онро дар махзани маълумоти электронӣ пешбинӣ намудааст.
Дар пайи муаррифӣ, аъзои Маҷлиси миллӣ, қарор дар бораи Қоидаҳои пешбурди сомонаи Маҷлиси миллии Маҷлиси Олии Ҷумҳурии Тоҷикистон, тартиби ҷойгир ва нав кардани маводи иттилоотиро қабул намуданд.
