ДУШАНБЕ, 17 ноя — Sputnik. Бино бар иттилои дафтари матбуоти вазорати тандурустӣ, дар доираи сафари корӣ ба вилояти Суғд, муовини вазири тандурустӣ ва ҳифзи иҷтимоии аҳолии Тоҷикистон Самариддин Ализода ва намояндаи Созмони ҷаҳонии беҳдошт дар Тоҷикистон, Бахтигул Карриева бо раиси вилоят Раҷаббой Аҳмадзода дидору гуфтугӯ анҷом доданд.
Манбаъ таъкид доштааст, ки раиси вилояти Суғд Раҷаббой Аҳмадзода зимни вохурӣ иброз доштааст, ки давоми солҳои охир дар вилояти Суғд садҳо муассисаҳои хуштарҳу замонавӣ ва муҷаҳҳаз бо таҷҳизоти ҳозиразамон сохта ба истифода дода шудааст.
Аҳмадзода зикр кардааст, ки дар самти таъмини солимии аҳолӣ аз ҷониби мақомоти вилояти Суғд тадбирҳои муҳим амалӣ мешаванд ва корҳо дар ин самт минбаъд низ идома хоҳанд ёфт.
Ҳамзамон зимни вохӯрӣ ҷонибҳо доир ба вазъи санитарию эпидемиологӣ дар вилояти Суғд ва тақвият бахшидани корҳо дар самти пешгирӣ ва табобати бемории COVID-19 табодули афкор карданд.
Таъкид шуд, ки роҳбарияти мақомоти вилояти Суғд барои пешгирӣ ва табобати бемории COVID-19 дар вилоят тамоми тадбирҳои заруриро андешида истодааст.
