ДУШАНБЕ, 16 ноя — Sputnik. Дар ноҳияи Дарвоз садамаи нақлиётӣ рух дод, ки дар пай талафоти ҷонӣ дошт, хабар медиҳад Вазорати умури дохилаи Тоҷикистон.
Ба иттилои манбаъ, ҳодисаи нохуш рӯзи 14 ноябр, тақрибан соати 20:00 дақиқа дар ҳудуди ноҳияи Дарвоз рух дод.
Манбаъ меафзояд, ронандаи автомашинаи тамғаи "УАЗ", Зикруллоев Иноятуллои 48 - сола, сокини ноҳияи Дарвоз, ҳангоми ҳаракат кардан дар роҳи мошингарди деҳаҳои Гушун-Дударги Қалъаихум дар ҳудуди ноҳияи Дарвоз аз уҳдаи воситаи нақлиёт набаромада, тахминан 20-метр ба ҷарӣ чаппа шудааст.
Боз садама дар тӯй: мошин бо домоди тоҷику арӯсаш ба истгоҳ бархӯрда, чаппа шуд
Дар натиҷа, ронандаи автомошинаи мазкур дар ҷойи ҳодиса ба ҳалокат расидааст.
Ҳамчунин, мусофирони дохили автомошина: Ҷӯраева Шаъмигули 42 - сола, Зикруллоев Эшонҷони 4 - сола, Давлатзода Сарвинози 20 - сола, сокинони ноҳияи мазкур ҷароҳатҳои ҷисмонӣ бардошта, дар беморхона бистарӣ карда шудаанд.
ВУД Тоҷикистон мегӯяд, аз рӯи ин ҳодиса тафтишот идома дорад.
