ДУШАНБЕ, 25 июн - Sputnik. Тибқи иттилои ВУХ Тоҷикистон, аз 25 июн парвозҳои чартерӣ барои баргардонидани шаҳрвандони Тоҷикистон аз Маскав, Санкт-Петербург, Қазон, Новосибирск ва Екатеринбурги Русия оғоз мегардад.
Вазорати умури хориҷӣ таъкид кардааст, ки ҷадвали зерин, ки бо мақомоти дахлдори Русия мувофиқа шудааст:
- 25 июни 2020 бо хатсайри Душанбе – Маскав – Душанбе, ширкати "Тоҷик Эйр"
- 26 июни 2020 бо хатсайри Душанбе – Қазон – Душанбе, ширкати "Тоҷик Эйр"
- 30 июни 2020 бо хатсайри Душанбе – Новосибирск – Душанбе, ширкати "Сомон Эйр"
- 1 июли 2020 бо хатсайри Душанбе – Маскав – Душанбе, ширкати "Сомон Эйр"
- 6 июли 2020 бо хатсайри Душанбе – СанктПетербург – Душанбе, ширкати "Сомон Эйр"
- 7 июли 2020 бо хатсайри Душанбе – Екатеринбург – Душанбе, ширкати "Тоҷик Эйр"
- 13 июли 2020 бо хатсайри Душанбе – Маскав – Душанбе, ширкати "Тоҷик Эйр"
- 14 июли 2020 бо хатсайри Душанбе – Маскав – Душанбе, ширкати "Сомон Эйр".
Мақомот таъкид карданд, ки дар раванди анҷом додани чунин парвозҳо авлавият ба табақаҳои осебпазир, пеш аз ҳама беморон, занону кӯдакони хурдсол, пиронсолон, донишҷӯён, инчунин шахсоне, ки ба сафари хидматӣ ба Русия рафта буданд, дода мешавад.
Зикр шудааст, ки бо дастури Ситоди ҷумҳуриявӣ оид ба пешгирӣ аз паҳншавии бемории COVID-19 масъалаи барқарор намудани парвозҳои доимӣ ба ва аз Русия, Туркия ва Чин аз ҷониби мақомоти марбута мавриди баррасӣ қарор дорад.
