ДУШАНБЕ, 16 июн — Sputnik. Корхонаи "САТН" пас аз маҳдудкуниҳои муваққатӣ бо иқтидори пурра фаъолияти худро ба роҳ монда, зиёда аз 500 нафар шаҳрвандон ба шуғли доимӣ фаро гирифта шудаанд, хабар медиҳад котиботи вилояти Суғд.
Ба хабари манбаъ, корхонаи мазкур бо риояи тамоми қоидаҳои гигиенӣ машғул ба кор шудааст.
"Аз даромадгоҳ ҳар як корманд пас аз безараргардонӣ вориди бино мешавад. Ҳамчунин кормандон бо ниқоби тиббӣ ва оина барои чашмон таъмин мебошанд, ки ин бевосита ба нигаҳдории саломатӣ ва пешгирӣ аз сироятёбӣ равона карда шудааст", - таъкид мешавад дар хабар.
Пешгирии коронавирус дар Тоҷикистон: вазир ба коргоҳи истеҳсоли ниқоб рафт
Зимнан, корхонаи "Ҷавонӣ" низ бо риояи қоидаҳои санитарӣ бо 1000 кормандаш ба фаъолият пардохт.
Фаъолияти асосии корхона ин коркарди нахи пахта ба ҳисоб рафта, иқтидори истеҳсолии он то 1250 тонна дар як сол мебошад. Дар коргоҳ аз пахта матоъ истеҳсол гардида ҳамзамон сарулибос аз матои соф пахта омода карда мешавад.
Ёдовар мешавем, ки сар аз 15 - уми июн маҳдудиятҳое, ки дар Тоҷикистон дар робита ба хуруҷи маризии коронавирус ҷорӣ карда шуданд, лағв гардиданд.
Ҳамакнун дари аксар корхонаву тарабхонаҳо, бозору мағозаҳо ба рӯи муштариён боз аст.
