ДУШАНБЕ, 14 июн – Sputnik. Ба нақл аз сомонаи рӯзномаи “Ҷумҳурият” донишмандони тоҷик дар ин семинар таъкид карданд, ки қонуни Тоҷикистон “Дар бораи маводи доруворӣ ва фаъолияти фарматсевтӣ” ба боздид ва такмил ниёз дорад.
Инчунин дар ин семинар олимону масъулини давлат пешниҳод карданд, ки дар муассисаҳои таълимии миёнаи умумӣ тадриси фанни "Тарзи ҳаёти солим" ҷорӣ карда шавад.
Манбаъ қайд кардааст, ки муовини Сарвазири Тоҷикистон Ширин Исматуллозода ва вазири саноат ва технологияҳои нав Заробиддин Файзуллозода пешниҳоду таклифҳои пажӯҳишгаронро шуниданд ва андешаҳои худро нисбат ба ин масъала ва иқдомҳои Ҳукумати ҷумҳурӣ барои пешгирӣ аз вирусҳои сироятӣ баён доштанд.
Инчунин дар ин ҷаласа Фарҳод Раҳимӣ, президенти Академияи миллии илмҳои Тоҷикистон таъкид доштааст, ки истеҳсоли маҳлулҳои безараргардонии пандемия ва бемориҳои сироятӣ чун маҳлули гипохлориди натрийи тиббӣ, оби нуқра, дастгоҳи нафаскашии сунъии ёрирасон аз ибтикороти амалист, ки олимони тоҷик онро дар мубориза бо коронавирус роҳандозӣ намуданд.
Гуфта шуд, ки дар як шабонарӯз ҳадди ақал 10 тонна маҳлули гипохлориди натрий истеҳсол мешавад.
“Дар мавриди дастгоҳи нафаскашии сунъӣ ҳаминро бояд тазаккур диҳем, ки бо татбиқи дизайн ва ороиши зоҳирӣ ин маводро метавонем содир кунем”, - гуфт Фарҳод Раҳимӣ.
Вай ҳамчунин афзуд, ки аз панҷ ҳазор рустании шифобахш танҳо 132 адади он хусусияти фармокологӣ дошта, имкон дорад аз онҳо маводи доруворӣ таҳия гардад. Бо дарназардошти мавриди коркарди истеҳсолӣ қарор гирифтани рустаниҳои шифобахш пешниҳод гардид, ки саноати дорусозӣ таҳкими бештар ёбад.
