ДУШАНБЕ, 6 июн — Sputnik. Гурӯҳи дигари шаҳрвандони Тоҷикистон, ки мехоҳанд ба ватан баргарданд, дар назди гузаргоҳи марзии Қазоқистон ҷамъ омадаанд, хабар медиҳад, дафтари матбуотии ВКХ.
Дар маҷмӯъ, ба гуфтаи Вазорати корҳои хориҷа, ҳоло беш аз 30 нафар дар нуқтаи гузаргоҳи марзии Қазоқистон ва Ӯзбекистон қарор доранд.
“Чунин ҳолат боис мегардад, ки то гирифтани иҷозати убури сарҳад аз мақомоти дахлдори Қазоқистон ва Ӯзбекистон мардуми дар марз дармонда сарсону саргардон шаванд”,-гуфтааст вазорат.
Манбаъ мегӯяд, намояндагиҳои дипломатӣ ва консулии Тоҷикистон дар Қазоқистон дар ҳамкорӣ бо ҷамъияти тоҷикони муқими он кишвар бо истифода аз имкониятҳои мавҷуда ба шаҳрвандони дар минтақаи марзӣ дармонда ҷиҳати таъмини онҳо бо ғизо ва ҷойи хоб мусоидат менамоянд.
Вазорати корҳои хориҷа дар робита ба баста будани марзҳо, ба ҳамватанон тавсия дода додааст, ки то ба эътидол омадани вазъи эпидемиологӣ дар минтақа аз сафар ба Қазоқистон ва Ӯзбекистон ва убури транзитӣ аз он ду кишвар худдорӣ намоянд.
Ёдовар мешавем 2 июни 237 шаҳрванди кишвар аз гузаргоҳи “Жибек Жоли”-и байни сарҳади давлатии Қазоқистон ва Ӯзбекистон, ки тайи чанд муддат дар ин ҷой дар мондаву аз шароити будубош шикоят мекарданд, дар ҳамоҳангӣ бо мақомоти ду кишвари мазкур ва мусоидати сохторҳои дахлдори Тоҷикистон ба Ватан баргардонида шуданд.
