ДУШАНБЕ, 07 май — Sputnik. Бино ба иттилои манобеъи Sputnik Тоҷикистон, лоиҳаи ангоравии шифохонаи гардон ё мобилӣ аз сӯи Корхонаи воҳиди давлатии “Пажӯҳишгоҳи илмӣ – таҳқиқотӣ ва лоиҳакашии “Душанбешаҳрсоз”, тобеъи ҳукумати шаҳри Душанбе сохта шуда, “Беморхонаи мобилӣ аз контейнерҳо” унвон дорад.
Бино ба ин манбаъ, ин шифохона аз рӯи муаллифаҳои зерин ба истифода хоҳад шуд: Зарфият: 416 кат ва 16 қабулгоҳ ё утоқи духтурон; масоҳати кулли варзишгоҳ 15 714.00 метри мураббаъ, минтақаи сохтмон - 3600 метри мураббаъ, масоҳати сатҳи роҳи бетонии қиршуда (асфалт) - 2400 метри мураббаъ, масоҳати роҳҳои убурӣ аз сангреза бунёдшуда - 2780 метри мураббаъ, марзи бетонӣ - 1170 метри мураббаъ.
Бино ба иттилооти восила ба Sputnik Тоҷикистон, ин шифохона тайи беш аз як ҳафта бояд дар варзишгоҳи “Бофанда”, воқеъ дар рӯ ба рӯи Корхонаи насоҷии тоҷик, дар миёни мардум маъруф ба “Текстил” сохта мешавад.
Тибқи ин гузоришҳо, бино ба тавофуқоти миёни Тоҷикистону Ӯзбекистон, фардо ҳудуди 120 контейнер аз ҷумҳурии ҳамсояи Ӯзбекистон вориди Душанбе хоҳад шуд. Қаблан Чин як шифохонаи гардони иборат аз ҳазор бистарро дар 10 шабонарӯз ва Ӯзбекистон як 500 – бистараро дар зарфи панҷ шабонарӯз сохта буданд. Қаблан Рустами Эмомалӣ, шаҳрдори Душанбе дастур дода буд, ки дар пойтахт як силсила беморхонаҳои муваққатӣ бо зарфияти беш аз 3 ҳазор кат барои табобати гирифторони “вируси корона” ё COVID-19 ташкил карда шавад.
Бино ба иттилои Маркази матбуотии шаҳрдори Душанбе, ин беморхонаҳо тамоми шароити замонавӣ, бахусус мутахассисони баландихтисоси соҳибтаҷриба, таҷҳизоти тиббӣ ва таъминоти дорувории баландсифатро дар ихтиёр хоҳанд дошт.
Тибқи иттилои расмӣ, то ба ҳол дар шаҳри Душанбе зиёда аз 30 шифохона бо 5 ҳазору 284 кати хоб ва беш аз 5 ҳазору 390 нафар табибу корманди миёнаи тиббӣ ба дармондагон хизмат мерасонанд.
