ДУШАНБЕ, 5 май — Sputnik. Дирӯз сарвазири Тоҷикистон Қоҳир Расулзода бо намояндагони Созмони ҷаҳонии беҳдошт ва роҳбари дафтари Созмони Милали Муттаҳид дар Тоҷикистон мулоқот намудааст, хабар медиҳад АМИТ “Ховар”.
Бино ба гузориши манбаъ, дар ин мулоқот таъкид шудааст, ки аз оғози хуруҷи бемории сироятии коронавируси нав Ковид-19 Ҳукумати Тоҷикистон барои пешгирӣ аз паҳншавии ин вирус тадбирҳои заруриро амалӣ менамояд ва ҷиҳати пешгирӣ аз паҳншавии ин бемории сироятӣ бо ташкилоту созмонҳои минтақавию байналмилалӣ, аз ҷумла Созмони ҷаҳонии беҳдошт, Созмони Милали Муттаҳид ва кишварҳои гуногуни ҷаҳон ҳамкориро тақвият мебахшад.
"Мутаасифона дар Тоҷикистон низ гирифторони ин вирус ба қайд гирифта шуда, шумораашон дар ҳоли афзоиш ёфтан аст".
Тибқи иттилои манбаъ, зимни мулоқот ҷонибҳо роҳу усулҳоеро, ки мутахассисони соҳаи тандурустӣ пешниҳод менамоянд, зарур дониста, таъкид намудаанд, ки барои пешгирии паҳншавии коронавируси Ковид-19 дар Тоҷикистон аз тамоми имконият истифода бурда хоҳад шуд.
Мулоқот бо намояндагони Созмони ҷаҳонии беҳдошт анҷом ёфт: тарафҳо ба чӣ хулоса расиданд?
Ҳамчунин дар мулоқот роҳбари Ситоди ҷумҳуриявӣ оид ба пешгирӣ аз паҳншавии бемории коронавирус-Ковид-19, сарвазир Қоҳир Расулзода даъват кардааст, ки намояндаи Созмони Милали Муттаҳид ва намояндагони Созмони ҷаҳонии беҳдошт ҷиҳати пешгирӣ аз паҳншавии бемории коронавирус дар Тоҷикистон барои ҷалб намудани кумаки амалии беруна аз ҷониби ташкилоту созмонҳои минтақавию байналмилалӣ ва кишварҳои ҷаҳон мусоидат намоянд.
