ДУШАНБЕ, 15 мар — Sputnik. Аз 1 майи соли 2020 ситондани 80 дирам, ки то ҳол ҳар моҳ аз соҳиби ҳар симкорти фаъол ситонда мешуд, лағв мегардад, хабар додаанд ширкатҳои мобилӣ ба мизоҷон. Далели ин қарор дастури Хадамоти зиддиинҳисории Тоҷикистон гуфта шудааст. Сабаби қатъи пулситонӣ гуфта нашудааст.
Аввали соли равон Абдулмаҷид Муминзод, сардори Хадамоти зиддиинҳисорӣ зимни нишасти матбуотӣ гуфт, ба ҳамаи ширкатҳои мобилӣ, инчунин ба Хадамоти алоқа мактуб равон карданд, то ки онҳо масъалаи ситондани 80 дирамро асоснок намоянд.
Бо шиносномаҳои нав, зери назорати камераҳо: Ҳукумат тартиби фурӯши симкортро тағйир дод
“Умедворем давоми як моҳи дигар ин масъала пурра таҳлил мешавад ва мо аз он натиҷагирӣ хоҳем кард”, - гуфт вай
Масъулини Хадамоти зиддиинҳисорӣ таъкид доштанд, ки аз ҷониби Хадамоти алоқа санади асосноккунӣ пешниҳод гардидааст, аммо бо дарназардошти муроҷиатҳои зиёд, Хадамот бояд ин масъала таҳлил намояд.
Ин дар ҳолест, ки ҳанӯз соли 2015 ширкатҳои мобилии Тоҷикистон муштариёнашонро огоҳ карда буданд, ки минбаъд ҳар моҳ аз ҳар симкорти фаъол 80 дирами иловагӣ ситонда мешавад.
Он замон ширкатҳо мобилӣ таъкид доштанд, ки “дар асоси фармоиши Хадамоти алоқа ва Хадамоти зиддиинҳисорӣ аз 1-уми июли соли 2015 пардохти муштарипулии ҳармоҳа барои истифодаи рақам 80 дирам ситонда мешавад”.
Се сол зиндон ё то 82 ҳазор сомонӣ ҷарима: шарҳи ҷазо барои додани симкорт ба нафари дигар
Тибқи иттилои расмӣ, дар кишвар феълан ҳудуди 6,8 миллион симкорти фаъол дар дасти мардум мебошад. Аз ин бармеояд, ки дар пайи роҳандозии пардохти нав ҳар сол беш аз 62 миллион сомонӣ аз кисаи мардум гирифта шуда, ба буҷаи давлат ворид мегардад.
