ДУШАНБЕ, 12 фев — Sputnik. Масъулини Кумитаи андоз имрӯз зимни нишасти матбуотӣ дар шаҳри Душанбе таъкид доштанд, ки новобаста аз чораҳои зиёди аз ҷониби мақомоти андоз андешидашуда, дар соли 2019 нақшаи андозҳо ва дигар пардохтҳои ҳатмӣ ба андозаи 96,1 дарсад таъмин гардидааст.
Ба гуфтаи мақомоти андози кишвар дар соли 2019 ба буҷети давлат 11 милиард 120 миллион сомонӣ ворид карда шуд.
Ин нишондиҳанда нисбат ба он нишондиҳандае, ки пешбинишуда буд 450 миллион сомонӣ камтар аст. Аммо ин рақам нисбат ба маблағҳои дар соли 2018 ба буҷет воридшуда буд ба андозаи 600 миллион сомонӣ зиёдтар аст.
“Иҷрои нақшаи воридоти андозҳо ва пардохтҳо дар ВМКБ ба андозаи 106,1 дарсад, вилояти Хатлон 100,0 дарсад, вилояти Суғд 100 дарсад, шаҳри Душанбе 100,9 дарсад ва нозироти андозсупорандагони калон, ки воридоти маблағҳо аз ин ҳисоб ба буҷети ҷумҳуриявӣ пешбинӣ шуда буд 67 дарсад таъмин карда шуд”, - зикр доштанд масъулини Кумитаи андоз.
Ҳамзамон масъулини Кумитаи андоз чанд илати иҷро нашудани нақшаи воридоти андозҳоро номбар кард.
Сабаби аввал, ин нокифоя афзоиш ёфтани манбаъҳои андозбандии субъектҳои соҳибкорӣ дар баъзе шаҳру ноҳияҳо ва аз ҷониби кормандони мақомоти андоз дар сатҳи зарурӣ таъмин накардани иҷрои уҳдадориҳои мансабӣ будааст.
Инчунин, вобаста ба кам гардидан ва ё нокифоя афзоиш ёфтани манбаъҳои андозбандӣ дар корхонаҳои калон ва ширкатҳои мобилӣ, бо сабаби дар бозори ҷаҳонӣ паст шудани нархи баъзе ашё ва молҳои ба содирот нигаронидашуда ва вобаста ба ин кам гирифтани даромад аз ҷониби якчанд корхонаҳои калони саноатӣ ва дигар омилҳои таъсиррасон ба буҷет нисбат ба нақшаи тасдиқшуда зиёда аз 516 миллион сомонӣ маблағҳо ворид нагардид, аз ҷумла аз ҳисоби ширкатҳои мобилӣ 432 миллион сомонӣ ворид нагаштааст.
Сабаби дигари таъмин нагардидани иҷрои қисми даромади буҷет ба он вобастаааст, ки дар соли 2019 нисбат ба соли 2018 маблағҳо аз ҳисоби санҷишҳои маҷмуии андоз ҳисобшуда, бо назардошти дар доираи қонунгузорӣ дар бораи мораторий ба танзим дароварда шудани санҷишҳо дар соҳаи истеҳсолӣ 210 миллион сомнӣ кам шуд.
