ДУШАНБЕ, 21 янв — Sputnik. Табодули замини миёни Тоҷикистону Қирғизистонро бо сокинони наздимарзӣ баррасӣ мекунанд, изҳор дошт дар нишасти ҳукумат сарвазири Қирғизистон Жениш Раззоқов.
"Бе розигии сокинони маҳаллӣ ягон табодули замин намешавад", - гуфт ӯ.
Ба гуфти Раззоқов, барои табодул ду минтақа - Оқ-Сой ва Самарқандак пешниҳод мешаванд.
Нахуствазир ваъда дод, ки ба ҳамаи сокинони наздимарзии аз 18-сола боло, ҳуқуқи ибрози андеша дода мешавад.
Ахиран шоми 9 январ дар марзи Тоҷикистону Қирғизистон муноқиша рух дод. Дар паи ин таниш сокинони наздимарзӣ ҳамдигарро сангборон карданд.
Раззоқов гуфт, чӣ аломатгузорӣ дар марзи Тоҷикистону Қирғизистонро мушкил мекунад
Ёдрас мешавем, ки ҳайатҳои Тоҷикистону Қирғизистон рӯзи 14 январ, ба ин тавофуқ расиданд, ки дар навбати аввал аз 467 километри марзи баҳсӣ 114 километри онро таъйин ва аломатгузорӣ кунанд.
Дар баробари ин дар ояндаи наздик дар минтақаҳои баҳсӣ чароғаки роҳнамо ва камераҳои назоратӣ насб карда мешаванд.
Бино ба иттилои расмӣ, соли 2019 дар минтақаҳои марзии Тоҷикистону Қирғизистон 14 муноқишаю тирандозӣ иттифоқ афтодааст, ки 6 шаҳрванди Тоҷикистон ва 1 шаҳрванди Қирғизистонро кушта ва зиёда аз 60 нафарро захмӣ ба ҷой гузоштааст.
