Washington Post: аз замони ҳамлаи Амрико ба Афғонистон беш аз 157 ҳазор нафар кушта шуд

ДУШАНБЕ, 15 янв — Sputnik. Бар асоси асноди маҳрамонаи мунташиршудаи рӯзномаи амрикоии Washington Post, аз замони ҳамлаи Амрико ба Афғонистон дар соли 2001 беш аз 64 ҳазор низомӣ ва 43 ҳазору 500 ғайринизомии афғон дар ҷанг кушта шудаанд, иттилоъ додааст хабаргузории “Parstoday”.

Рӯзномаи Washington Post шумори аъзои кушташудаи Толибон дар ин солҳоро низ беш аз 42 ҳазор нафар тахмин задааст.

Ин гузориш шумори низомиёни амрикоии кушташударо беш аз шаш ҳазор нафар ва дигар низомиёни хориҷии узви НАТО –ро низ ҳазору 145 нафар эълом кард.

Коршиносони масоили сиёсии Афғонистон бар ин боваранд, ки 19 сол ҳузури низомӣ ва пурҳазинаи Амрико дар Афғонистон ҷуз тахриби зерсохтҳои ин кишвар ва куштори беш аз сад ҳазор ғайринизомӣ ва низомии афғон ва ҳазорон низомии хориҷӣ дастоварде надоштааст.

Ҳазинаи низомии Амрико дар ин муддат дар Афғонистон 2 триллион доллар арзёбӣ шудааст.