ДУШАНБЕ, 9 янв — Sputnik. Қодири Қосим, ки феълан роҳбарии Кумитаи иттифоқҳои касабаи Тоҷикистонро ба уҳда дорад, аз сӯи ҲХДТ аз ҳавзаи якмандатии Ванҷ №40 ҳамчун номзад ба вакилӣ пешбарӣ гардид.
Тибқи иттилои мақомоти иҷроияи ВМКБ, дар конфронси Кумитаи иҷроияи ҲХДТ дар ВМКБ, раиси вилоят Ёдгор Файзов, вакилон аз навоҳии Дарвоз, Ванҷ, Рушон, Шуғнон ва роҳбарони кумитаву ташкилотҳои ибтидоӣ номзадии Қодири Қосимро пуштибонӣ кардаанд.
Қодири Қосим, зодаи ноҳияи Ванҷ, хатмкардаи Донишкадаи кишоварзии Тоҷикистон, собиқ роҳбари Кумитаи давлатии сармоягузорӣ ва идораи амволи давлатӣ ва аз соли 2017 роҳбари Кумитаи иттифоқҳои касабаи Тоҷикистон мебошад.
