ДУШАНБЕ, 6 окт - Sputnik. Эмомалӣ Раҳмон, барномаи махсуси давлатӣ барои такмили таълиму омӯзиши забонҳои русӣ ва англисиро дар Тоҷикистон барои то соли 2030 имзо карда, Вазорати маорифро муваззаф намудааст, ки ҳар сол аз иҷрои барнома ба Ҳукумат гузориш диҳад.
Раисиҷумҳур ба Вазорати молия дастур додааст, ки аз 1 январи соли 2021 барои беҳбуди омӯзиши забонҳои англисию русӣ дар Тоҷикистон маблағ ҷудо кунад ва истифодаи дигар сарчашмаҳои қонунии маблағгузориро низ ҷоиз хондааст.
Дар барномаи тасдиқшуда, таъкид гардидааст, ки омӯзиши забони русӣ ҳамчун забони муоширати байни миллатҳо ва англисӣ, ки паҳншудатарин дар ҷаҳон аст, имконоти насли наврасро бештар мекунаду барои амалисозии зарфиятҳо дар бахшҳои гуногун мусоидат менамояд.
Қайд шудааст, ки аз сатҳи таълиму омӯзиши забонҳои русӣ ва англисӣ, сатҳи маълумоти умумию тахассусӣ вобаста буда, барои рушди минбаъдаи шаҳрвандон дар соҳаҳои гуногун омили муҳим мебошад. Ҳамчунин муҳим хонда шудааст, ки тариқи омӯзиши забонҳои русию англисӣ тоҷикистониён бо фарҳангу адабиёти ин миллатҳо шинос мешаванд.
Раҳмон гуфт, кай забон расман "тоҷикӣ" шуд: изҳороти Президент баъди баҳсҳо атрофи ном
Ҳукумати Тоҷикистон дар баробари Вазорати маориф, инчунин Академияи улум, муассисаҳои илмӣ ва таълимии ҳамаи сатҳҳоро вазифадор кардааст, ки иҷрои барномаи мазкурро таъмин намоянд.
