ДУШАНБЕ, 7 авг – Sputnik. Бино бар иттилои дафтари матбуоти раисҷумҳури Тоҷикистон, Осорхонаи таърихӣ-кишваршиносии қаҳрамони халқи тоҷик Восеъ бо саҳми соҳибкорони маҳаллӣ дар мавзеи Дараи Мухтор, воқеъ дар зодгоҳи ин шахсияти бузурги миллати тоҷик сохта шудааст.
Тавре манбаъ зикр намудааст, корҳои сохтмонии бино моҳи апрели соли равон оғоз гардида, бинокорони маҳаллӣ тавонистанд дар кӯтоҳтарин муҳлат онро бунёд намоянд.
“Эмомалӣ Раҳмон аз ин иқдоми созандаи соҳибкорону шахсони ватандӯст изҳори минатдорӣ намуда, бунёди чунин иншооти фарҳангиро дар доираи эълон гардидани солҳои 2019-2021 Солҳои рушди деҳот, сайёҳӣ ва ҳунарҳои мардумӣ туҳфаи арзишманд маънидод кард”- қайд намудааст дафтари матбуоти раисҷумҳур.
Насиҳати Раҳмон ба кормандони меҳмонхонаи “Чилчанор” ва ваъдаи соҳибкор Каримов
Бинои Осорхона аз ду ошёна ва таҳхона иборат буда, дар он нигораҳо ба таври замонавӣ ба намоиш гузошта шудаанд.
Масъулин ба Эмомалӣ Раҳмон иттилоъ доданд, ки айни ҳол дар инҷо 1893 адад нигораҳо, аз ҷумла 1393 адад асосӣ ва 500 адад ёрирасон маҷуд аст.
Феълан дар ин Осорхона ашёҳо аз рӯзгор ва фаъолияти ин қаҳрамони халқи тоҷик ва маснуоти мисӣ, чӯбин, сангӣ, биринҷӣ, сафолӣ, дастхатҳои қадима ва дигар нигораҳо мавҷуданд.
Ҳамчунин пайкараи ин қаҳрамон дар рӯ ба рӯи бинои нав бо баландии 6 метр гузошта шудааст.
Дар ҳудуди Муассисаи давлатии “Осорхона -мамнӯъгоҳи ҷумҳуриявии ба номи Восеъ” ҳамчунин меҳмонхона барои қабули 28 нафар дар як вақт бунёд гардидааст.
Масъулин бар онанд, ки навсозии ин мавзеъ барои ҷалби таваҷҷуҳи бештари сайёҳони дохиливу хориҷӣ ба маконҳои таърихию фарҳангӣ ва шиносоии бештари тамаддуни пурғановати миллати тоҷик ба ҷаҳониён замина фароҳам хоҳад овард.
