ДУШАНБЕ, 2 авг — Sputnik. Наврӯз Валиев, раиси минтақавии Бонки миллӣ дар Хуҷанд гуфт, ки зиёд шудани касри савдои хориҷӣ аз ҳисоби воридоти маҳсулот, вазъи бозори асъорро мураккаб сохта, ба пастравии қурби пули миллӣ боис гардидааст.
Ба иттилоъи ӯ, давоми шаш моҳи соли ҷорӣ ҳаҷми маҳсулоти содиротӣ дар Суғд дар маҷмӯъ 224, 5 миллион доллар буда, дар муқоиса ба соли гузашта ба андозаи 20, 2 % коҳиш ёфтааст. Дар ин давра ҳаҷми маҳсулоти воридотӣ ба беш аз 562 милион доллар афзудааст.
“Мо ҳамагӣ ба хориҷи кишвар ба маблағи 224, 5 миллион доллар бор фурӯхтем, лекин аз хориҷи кишвар ба маблағи 787, 4 миллион доллар бор харидем. Фарқ байни ин рақам ҳудуди 562, 9 миллион доллар аст. Яъне барои харидани бор аз хориҷа маблағи фурӯши маҳсулоти мо кифоят накарда боз ҳам 562, 9 миллион доллар лозим буд. Ин ҳолат вазъи бори асъорро дар ин давра бисёр мураккаб сохт ва дар бисёр ҳолатҳо лаппишхурии қурби пули миллӣ дида мешуд”, - афзуд Наврӯз Валиев.
Раиси минтақавии Бонки миллӣ дар Хуҷанд дар нишасти хабарӣ гуфт, ки ба ҳисоби молу маҳсулотҳое, ки характери стратегӣ доранд: воситаҳои нақлиёт, маҳсулоти нафтӣ, гандум ва фузулоти маъдан, инчунин талаботи мардум аз ҳисоби маҳсулотҳои биринҷ, ҳасиби маҳсулотҳои гӯштӣ, гӯшти парандаи хонагӣ, афшураи меваҳо, калоба ва ришта қонеъ карда шудааст, ки асосан аз хориҷа ворид шудаанд.
Дар ҳоле, ки барои истеҳсоли онҳо дар кишвар имкониятҳои васеъ мавҷуданд.
“Ҳамаи ин ба он оварда расонид, ки тавозуни савдои хориҷии мо ниҳоят зиёд шуда, 562, 9 миллион долларро ташкил намуд. Ин рақам нисбат ба ҳамин давраи соли гузашта 27, 4 % ҳиссаи касри савдоро зиёд намуд”, - гуфт Валиев.
Дар ин давра аз ҳудуди вилояти Суғд семент, нахи пахта ва маҳсулотҳои маъданӣ ва кишоварзӣ содирот шудаанд.
