ДУШАНБЕ, 7 июл - Sputnik. Тибқи иттилои дафтари матбуоти раисиҷумҳури Тоҷикистон, Эмомалӣ Раҳмон дар паёми шодбошияш ба Назарбоев, саломатии комилу дастовардҳои нав таманно карда, аз эҳтироми мардуми қазоқ нисбати Пешвои миллати худ зикр кардааст.
“Дар ин рӯзи барои Шумо, пайвандонатон, наздиконатон ва дӯстонатон муҳим аз самими қалб ба Шумо саломатии комил, саодат, некуаҳволӣ, нерумандии бардавом ва дастовардҳои нав ба манфиати мардуми қазоқ, ки нисбат ба Пешвои миллати худ эҳтироми бузург доранд, таманно дорам”, - омадааст дар паёми раисиҷумҳури Тоҷикистон.
Эмомалӣ Раҳмон дар идома рушди муваффақонаи муносибатҳои мутақобилаи Тоҷикистону Қазоқистонро дар сиғаи ҳамкории стратегӣ зикр намудааст.
Назарбоев 6-уми июл 79-умин солгарди мавлудашро таҷлил намуд. Ҳамчунин мардуми Қазоқистон 6-уми июл Рӯзи пойтахт – Нурсултонро ҷашн гирифтанд.
Остонаи қаблӣ, ки ҳозир Нурсултон ном дорад, 21 сол боз пойтахти Қазоқистон буда, ин Рӯзи пойтахт бо номи нав бори аввал таҷлил мешавад.
