ДУШАНБЕ, 29 июн — Sputnik. Раисҷумҳури Тоҷикистон Эмомалӣ Раҳмон бо сафари расмӣ дар пойтахти Белорус шаҳри Минск қарор дорад.
Гуфта мешавад, президент Раҳмон зимни сафари худ аллакай бо ҳамтои белорусии худ Александр Лукашенко дидору гуфтугу намуд.
Дар рафти мулоқоти сарони ҳар ду давлат, Александр Лукашенко аз табодули молу коло миёни Тоҷикистон ва Белорус сахт интиқод кард.
"Белорус тасмим гирифтааст, фаъолияти мунтаззам дар сохаи иқтисодӣ бо Ҷумҳурии Тоҷикистонро идома диҳад. Гардиши мол миёни Белорусия ва Тоҷикистон ки соли гузашта дар ҳаҷми 40 миллион доллари амрикоӣ сурат гирифта буд, қобили қабул нест. Бар ин боварам, ки костагии табодули молу коло миёни ду кишвар муваққатӣ буда дар кӯтоҳтарин фурсат ҳалли худро пайдо мекунад",- хабар медихад Sputnik Беларусь бо истинод ба суханони Лукашенко.
Роҳбари Белорус илова намуд соли дуввум аст, ки миёни Белорус ва Тоҷикистон истеҳсолоти муштарак ба роҳ монда шудааст ва барои ривоҷи ин соҳа бояд корҳои бештареро ба анҷом расонд.
Президент пешниҳод намуд, корхонаҳое, ки ба воридоти молу маҳсулоти муштараки Тоҷикистону Белорус машғуланд, аз пардохти андоз озод сохта, бар ивази ин ҳаҷми воридоти бор, маҳсулоти сохтмонӣ ва техникаи нақлиётиро бештар ба роҳ монд.
