ДУШАНБЕ, 27 июн — Sputnik. Тибқи иттилои додгоҳ, Содиқов Носирҷон Шокирҷонович аз шаҳри Исфараи вилояти Суғд моҳи октябри соли 2017 ба хизмати ҳарбӣ ба қисми ҳарбии Вазорати мудофиа сафарбар карда шуд.
Манбаъ афзуд, ки ҷанҷол миёни сарбоз Содиқов ва сержант Салоҳиддинхонов моҳи майи соли равон рух додааст.
Бар асоси иттилоия, Содиқов аз 3 то 4 майи соли 2019 навбатдори ошхонаи қисми ҳарбӣ таъин гардида буд.
“Худи ҳамон рӯз тахминан соати 20:00 дақиқа барои истеъмоли хуроки шом ба ошхона сержанти хурд Салоҳидинхонов Ҷалолиддинхон Ҷамолиддинхонович, ки дар наряди патрулӣ буд бо ҳамроҳии ҳамхизмати худ сарбози қаторӣ Шарипов Раҷабалӣ Ғайратович омаданд. Ин ҷо Содиқов аз сабаби он, ки хӯроки шом тайёр нашуда буд Салоҳиддинхонов ва Шариповро аз ошхона пеш менамояд”, - омадааст дар иттилоия.
Додгоҳ мегӯяд, Салоҳидинхонов фаҳмондааст, ки бояд ҳарчӣ зудтар ғизо истеъмол кунаду ба навбатдорӣ баргардад, аммо Содиқов аз ин суханони сержант ба ғазаб омада, гиребонгири ҳамдигар шудаанд.
Ҷанҷоли ин хизматчӣ дар пушти ошхона давом карда, Содиқов бо мушти дасти росташ ду-се маротиба ба чашми рости Салоҳидинхонов зарба зада, ҷароҳати ҷисмонӣ расонидааст.
Ташхиси судӣ-тиббӣ ҷароҳати ҷисмонии сержанти хурд дар намуди хуномос ва хунрезиш дар мавзеи чашми ростро муайян кардааст, ки тезгузар буда, мансуб ба зарари саломатӣ дониста нашудааст.
Додгоҳи ҳарбии гарнизони Душанбе Содиқов Носирҷон Шокирҷоновичро бар асоси моддаи 373 қисми 1 Кодекси ҷиноӣ гунаҳкор дониста, шартан ба як соли зиндон маҳкум кардааст.
