ДУШАНБЕ, 31 май — Sputnik. Тибқи иттилои Вазорати умури хориҷии Тоҷикистон дар остонаи ин ҷаласа Давлаталӣ Саид бо Қурбонгулӣ Бердимуҳаммедов, раисиҷумҳури Туркманистон густариши ҳамкориҳоро баррасӣ намуданд.
Ба иттилои манбаъ, ноиби нахуствазири Тоҷикистон ва раисиҷумҳури Туркманистон аз ҷумла ҳамкориҳои нақлиётӣ – транзитиро ба баррасӣ гирифтаанд.
“Дар ҷараёни мулоқот ҷонибҳо роҷеъ ба ҷанбаҳои калидии шарикии Тоҷикистон ва Туркманистон, аз ҷумла соҳаҳои сиёсӣ, иқтисодию тиҷоратӣ, кишоварзӣ, нақлиётӣ-транзитӣ, энергетика ва саноат, илму маориф ва гуманитарии мавриди таваҷҷуҳи ду кишварро баррасӣ карданд”, - омадааст дар иттилоияи ВУХ Тоҷикистон.
Ин ниҳод таъкид намудааст, ки “зимни вохурӣ тарафҳо ҳавасмандии хешро роҷеъ ба рушду густариши муносибатҳои шарикии Туркманистону Тоҷикистон дар робита ба маҷмуъи масоили ҳамкории ду кишвар изҳор намуданд”.
Аммо дар бораи тавофуқоти мушаххаси ҳосилшуда дар ин мулоқот феълан иттилое ироа нашудааст.
Ин дар ҳолест, ки қаблан хабар дода шуд, Туркманистон барои интиқолдиҳандагони бори самти Тоҷикистон мушкил эҷод кардааст. Вазорати нақлиёти Тоҷикистон ба ронандаҳои дармонда дар марзи Туркманистон маслиҳат дода буд, ки аз роҳҳои самти Қазоқистону Озарбойҷон истифода баранд.
Ҳайати ҳукуматие аз Тоҷикистон моҳи марти соли равон ба Озарбойҷон сафар анҷом дода, имкониятҳои интиқоли бори бештар ва гирифтани сабукиҳо тариқи ин кишварро баррасӣ намуданд.
