ДУШАНБЕ, 28 мая — Sputnik. Бино бар иттилои дафтари матбуоти раисҷумҳури Тоҷикистон, Эмомалӣ Раҳмон, президенти кишвар бо Нурсултон Назарбоев, нахустин раисҷумҳури Қазоқистон дар бораи дурнамои рушди ҳамкориҳои судманд миёни Тоҷикистону Қазоқистон суҳбат кард.
Тавре манбаъ қайд намудааст, дар рафти вохӯрӣ, ки дар фазои дӯстона доир гардид, Эмомалӣ Раҳмон бо таъкиди ҷараёни рушди бомуваффақияти муносибатҳои шарикии стратегии Тоҷикистон ва Қазоқистон дар ҳама арсаҳои ҳамкорӣ нақши хоссаи нахустин Президенти Қазоқистон Нурсултон Назарбоевро дар ин раванд махсус қайд карданд.
Зимнан Президенти Тоҷикистон Эмомалӣ Раҳмон иброз намудааст, ки ҷонибҳо бо саъю талошҳои муштараки минбаъда ҳамкории гуногунҷанбаи Тоҷикистону Қазоқистонро ба зинаҳои нав хоҳанд баровард.
Ёдрас мешавем, ки имрӯз Эмомалӣ Раҳмон, раисҷумҳури Тоҷикистон барои иштирок ба ҳайси меҳмони фахрӣ дар ҷаласаи Шӯрои олии иқтисодии Авруосиёи Иттиҳоди иқтисодии Авруосиё ба шаҳри Нур-Султони Қазоқистон сафар кард.
