ДУШАНБЕ, 10 май — Sputniк. Хонандагону мактаббачагони муассисаҳои таҳсилотии Тоҷикистон дар Фестивал-озмуни байналхалқии эҷодиёти кӯдакону наврасон "Садбарги Шарқ" ("Роза Востока") дар шаҳри Тошканд иштирок намуда сазовори ҷойҳои намоён гаштаанд, иттилоъ додааст дафтари матбуотии Вазорати фарҳанги Тоҷикистон.
Хонандаи мактаби хусусии Пулодови шаҳри Хуҷанд - Фарзона Назарова дар Фестивал-озмуни байналхалқии эҷодиёти кӯдакону наврасон "Садбарги Шарқ" , ки аз 4 то 8 майи соли равон дар шаҳри Тошканди Ҷумҳурии Узбакистон баргузор гардид, дар жанри вокал иштирок намуда, байни қариб 1000 иштирокчӣ сазовори ҷои сеюм гардидааст.
Манбаъ афзудааст, ки аз Ҷумҳурии Тоҷикистон дар фестивали мазкур инчунин хонандаи Мактаби хонандагони болаёқати шаҳри Хуҷанд Сарвиноз Ҳамдамова, донишҷӯи Коллеҷи санъати ба номи Содирхон Хофизи шаҳри Хуҷанд Шерзод Абдуллозода, донишҷӯи факултаи санъати Донишгоҳи давлатии Хуҷанд ба номи академик Бобоҷон Ғафуров Фирдавс Сангинов ва гурӯҳи рақсии "Новая Эра" аз шаҳри Душанбе иштирок намуда, соҳиби дипломи Фестивал-озмун гардиданд.
Дар Фестивал-озмуни байналхалқии эҷодиёти кӯдакону наврасон "Садбарги Шарқ" қариб 1000 нафар намояндагони давлатхои Қазоқистон, Қирғизистон, Россия, Арманистон, Озарбойҷон, Ҳиндустон ва Узбакистон дар жанрҳои вокал ва хореография дар гурӯҳи синнусолии аз 4 то 17 сола ва аз 18 то 28- сола рақобат намуданд.
