ДУШАНБЕ, 7 май — Sputnik. Бино бар ташрифи меҳмонон ва сайёҳони зиёд ба пойтахти Тоҷикистон раиси шаҳри Душанбе Рустами Эмомалӣ дастур додааст, ки тарабхонаҳои шаҳр фаъолияташонро аз соати 11:00 оғоз намоянд.
“Раиси шаҳри Душанбе Рустами Эмомалӣ бо назардошти зиёд гардидани ташрифи меҳмонон ва сайёҳон ба шаҳри Душанбе ба мақомоти дахлдори шаҳрдорӣ дастур доданд, ки оғози фаъолияти тарабхонаҳои шаҳрро дар моҳи шариф Рамазон аз соати 11:00 ба роҳ монда, ҷиҳати ба таври пурраву мунтазам хизматрасонӣ намудани онҳо мусоидат намоянд”, -таъкид намудааст манбаъ.
Инчунин шаҳрдорӣ қайд намудааст, ки дар ҳолати иҷро нагардидани талаботи мазкур нисбати соҳибмулкони тарабхонаҳо тадбирҳои дахлдор андешида хоҳад шуд.
Ёдрас мешавем, ки қаблан Нӯъмон Абуғаффорзода, раиси Кумитаи рушди сайёҳии Тоҷикистон, эълон карда буд, ки давоми соли 2018 ба кишвар беш аз 1 миллиону 155 ҳазор нафар сайёҳи хориҷӣ ташриф оварда буд.
Инчунин вай таъкид намуд, ки омори пешниҳодшуда нисбат ба соли 2017 2,6 баробар зиёд мебошад.
Нӯъмон Абуғаффорзода раванди афзоиши ташрифи сайёҳони хориҷӣ ба мамлакатамонро ба сиёсати “дарҳои боз”-и ҳукумати Тоҷикистон, ба роҳ мондани раводиди электронӣ, муаррифии зарфиятҳо ва имкониятҳои туристии кишвар, инчунин тавсеаи муносиботи гуногунсоҳа байни Тоҷикистону Узбакистон рабт дод.
