ДУШАНБЕ, 3 май – Sputnik. Кумитаи дини Тоҷикистон аз Дастгоҳи иҷроияи раисҷумҳури кишвар дархост кард, ки 594 масҷиди масдудшуда дубора ба кор дароянд. Дар ин бора расонаҳои Тоҷикистон хабар додаанд.
Рӯйхати масҷидҳои басташударо кумита ба дастгоҳ ирсол кардааст.
"Дар рӯйхат асосан номи масҷидҳое омадааст, ки дар ҷамоат ва қишлоқҳои дурдаст ҷойгир шудаанд. Дар ин ҷойҳо сокинон барои адои намоз маҷбур мешаванд, ки ба деҳа ё ҷамоати дигар раванд, ки хусусан барои солхӯраҳо мушкил аст", - омадааст дар иттилои манобеъ.
Қайд карда мешавад, ки феълан феҳристи масҷидҳои басташуда бо дастгоҳи раисҷумҳури Тоҷикистон ва роҳбарияти шаҳру навоҳиҳо мувофиқа карда мешавад.
Шояд масҷидҳои мазкур то аз оғози моҳи шарифи Рамазон ба кор дароянд.
Ёдрас мешавем, тибқи иттилои расмӣ, дар соли 2017 дар Тоҷикистон бештар аз 1,7 ҳазор масҷид масдуд шуда буд. Дар соли 2018 танҳо дар ҳудуди вилояти Суғд 120 масҷид дарашро баст. Биноҳо ба марказҳои тиббӣ, дузанагӣ ва варзишгоҳу китобхона табдил дода шуданд.
