ДУШАНБЕ, 10 апр - Sputnik. Қоҳир Расулзода, сарвазири Тоҷикистон имрӯз, 10 апрел ба вилояти Хатлон сафар карда, дар маросими ифтитоҳи чанд иншооти тоза иштирок кардааст.
Нахуствазир дар ноҳияи Ҳамадонии вилоят дар деҳаи Меҳнатобод маркази хизматрасониеро ба истифода додааст, ки аз ҷониби соҳибкори маҳаллӣ Ёқуб Достиев бунёд гардидааст. Дар марказ 10 коргар бо ҷои кор таъмин гардиданд.
Дар деҳаи Пахтакори ҳамин ноҳия Расулзода дар маросими ифтитоҳи майдони варзишӣ иштирок кард. Майдони варзишӣ аз ҷониби соҳибкор Абдуҷаббор Хушвахтов бунёд шудааст.
Ҳамчунин Қоҳир Расулзода дар ҷамоати Панҷоби ноҳияи Ҳамадонӣ маркази саломатӣ, майдони варзишӣ, маркази хизматрасонӣ ва савдоро мавриди баҳрабардорӣ қарор дод, ки аз ҷониби соҳибкорон бунёд шудаанд.
