ДУШАНБЕ, 30 мар - Sputnik.Зарфи як шабонарӯзи гузашта дар қаламрави кишвар 20 ҳодисаи лағжиши тарма ва резиши санг ба қайд гирифта шудааст, хабар медиҳад Кумитаи ҳолатҳои фавқуллодаи Тоҷикистон.
"Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикстон бори дигар аз аҳолии кишвар бо эҳтиром хоҳиш мекунад, ки аз сафарҳои безарурат худдорӣ варзанд, ба маҳалҳое, ки хавфи лағзиши тарма таҳдид мекунад, куҳгардӣ накунанд, ба ғунучини алафу ҳезум нараванд. Хеле эҳтиёткор ва зираку баҳуш бошанд", - таъкид мекунад манбаъ.
Ба асари боришоти шадид дар қаламрави куҳии мамлакат хатари лағзиши тарма ва резиши санг ҳифз мешавад. Хатари бештар дар ин рӯзҳо дар роҳҳои мошингарди Душанбе – Сангвор, Хоруғ – Ишкошим таҳдид мекунад.
Зарфи як шабонарӯзи гузашта дар ноҳияҳои Ванҷ, Шуғнон, Рӯшон, Ишкошими ВМКБ, ноҳияи Сангвор ва роҳи мошингарди Душанбе – Чаноқ лағзиши тарма ва резиши санг ба қайд гирифта шуд. Дар маҷмуъ дар кулли қаламрави Тоҷикистон зарфи шабонарзӯи гузашта 20 ҳодисаи лағзиши тарма ва резиши санг ба сабт шудааст. Хушбахтона, ин сангрезишу ин тармалағзишҳо талафоти ҷонӣ надоштанд.
Дар деҳаи Дараи Ҳайрони ноҳияи Сангвор бар асари лағиши тарма 4 хоҷагии ёрирасон зери ғарами барф монд. Дар натиҷа талафоти чорвои калону хурди хонагӣ ба қайд гирфита шудааст. Дар ҷойи ҳодиса Комиссияи ҳолатҳои фавқулода фаъолият мебарад ва андозаи зарари расидаро муайян мекунад.
Дар натиҷаи боришоти пуршиддати борон обшавии барфҳо ба мушоҳида расидааст, ки ин ҳодиса метавонад муҷиби ковоку нарм шудани хок ва лағзиши он аз теппаҳо гардад. Ҳамчунин дар ин рӯзҳо болоравии сатҳи оби рӯдхонаҳо, махзанҳои об эҳтимол дорад. Бориши пайдарпайи борон хатари лағзиши тармаву сангро дар роҳҳои куҳӣ бештар кардааст.
Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикстон бори дигар аз аҳолии кишвар бо эҳтиром хоҳиш мекунад, ки аз сафарҳои безарурат худдорӣ варзанд, ба маҳалҳое, ки хавфи лағзиши тарма таҳдид мекунад, куҳгардӣ накунанд, ба ғунучини алафу ҳезум нараванд. Хеле эҳтиёткор ва зираку баҳуш бошанд.
Дар сурати рӯй додани ин ё он ҳодисаи фавқулода ва ҳодисаҳои нохӯш бо телефонҳои бахши навбатдории фаврии Кумитаи ҳолатҳои фавқулодда ба кумак даъват кунанд:
93 880 28 19;
221-91-19;
223-13-11.
