ДУШАНБЕ, 14 фев — Sputnik. Қарори Рустами Эмомалиро дар ин бора дафтари матбуоти шаҳрдорӣ имрӯз нашр кард.
Бар асоси қарори мазкур, нақшаи чорабиниҳои Ҳукумати пойтахт барои омодагӣ ва таҷлили Иди байналмилалии Наврӯз - 2019 тасдиқ гардида, муовинони раис ва роҳбарони навоҳии пойтахт масъули иҷрои он таъин шудаанд.
Раёсати иттилоот ва робитаҳои хориҷии дастгоҳи раиси шаҳри Душанбе ва расонаҳои давлатии пойтахт муваззаф шудаанд, рафти татбиқи нақшаи чорабиниҳоро тавассути васоити ахбори омма инъикос намоянд.
Расман дар Тоҷикистон иди Наврӯз рӯзҳои 21, 22, 23 ва 24-уми март таҷлил мегардад. Бар асоси қонунгузории Тоҷикистон дар бораи рӯзҳои ид, бинобар ба 23 ва 24 рост омадани рӯзҳои шанбе ва якшанбе рӯзҳои кории баъди он – 25, 26 март истироҳатӣ хоҳанд буд.
