ДУШАНБЕ, 23 янв — Sputnik. Вазорати умури дохилаи Тоҷикистон хабар медиҳад, ки кормандони милиса дар ноҳияи Панҷ ба иттиҳоми ғоратгарӣ ду ҷавонро боздошт кардаанд.
Бино бар иттилои манбаъ, ба ШВКД дар ноҳияи Панҷ марди 28-солаи сокини ноҳияи мазкур бо аризаи шикоятӣ муроҷиат намудааст.
Ба гуфтаи ҷавон, 21-уми январ, тахминан соати 17:00-дақиқа, дар кӯчаи А.Рӯдакии ҳамин ноҳия шахсони номаълум бо роҳи зӯроварӣ аз дохили ҷайби курткааш 3000-сомониро тасарруф намуда, аз ҷойи ҳодиса ғайб задаанд.
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия ду ҷавони 19 ва 20-солаи сокинони ноҳияи Панҷ бо гумони ғоратгарӣ дастгир карда шудаанд.
Ҳодиса мавриди тафтиш қарор дорад.
