ДУШАНБЕ, 18 янв — Sputnik. Амонатбонк бо мақсади саҳмгузорӣ дар ғанӣ гардидани Буҷети давлатӣ дар соли гузашта аз рӯи фаъолияти худ ба андозаи 52 млн. сомонӣ андозу пардохтҳои ҳатмиро ба буҷети давлат пардохт намудааст, ки нисбат ба соли 2017 панҷ миллион сомонӣ ва ё 10,5 дарсад зиёд мебошад.
Дар ин бора зимни нишасти матбуоти Раиси Раёсат Амонатбонк Руҳулло Ҳакимзода иттилоъ додааст.
Ба гуфтаи вай, дороиҳои Бонк маблағи 4,2 миллиард сомонӣ ва уҳдадориҳои Бонк 3,8 миллиард сомониро ташкил дода, нисбат ба соли 2017 ҳаҷми дороиҳо 14,5 дарсад ва уҳдадориҳо 14,3 дарсад зиёд гардид.
Дар ҳамин ҳол сармояи Бонк, 10 дарсад афзоиш ёфта, ба 396,7 млн. сомонӣ баробар шуд.
Даромади умумии соҳа дар соли ҳисоботӣ 518,8 млн. сомонҳ, хароҷоти умумӣ 463,3 млн.сомонӣ, даромади тавозунӣ 55,5 млн. сомонӣ ва даромади соф 36 млн. сомониро ташкил намуд, ки нисбат ба соли 2017 13,2 дарсад зиёд мебошад.
