ДУШАНБЕ, 5 дек — Sputnik. Арчаи солинавии маркази вилояти Суғд - шаҳри Хуҷандро бо 40 ҳазор чароғаки ороишӣ зеб медиҳанд, хабар медиҳад Ҳукумати вилояти Суғд.
Бино бар иттилои манбаъ, арчаи солинавӣ дар Хуҷанд бо 20 метр баландӣ ва 9 метр паҳноӣ қомат хоҳад афрохт.
Ба гуфтаи масъулин, бори аввал аст, ки арчаи солинавиро дар маркази вилоят бо чунин шаҳомат насб мекунанд.
"Арчаи Соли навии маркази вилоятро 40 000 чароғаки ороишӣ бо зиёда аз 4000 бозичаҳои гуногун бо дизайни муосир зеб медиҳад", - менависад манбаъ.
Интизор меравад арчаи солинавӣ дар Хуҷанд то 10 декабр қомат афрозад.
Ин дар ҳолест, ки пештар масъулини шаҳрдории Душанбе низ эълом карда буданд, ки дар пойтахт арчаи баландтарин насб мекунанд. Ба гуфтаи масъулин, имсол арчаи солинавӣ ба хотири бузургтару баландтар буданаш дар наздикии тандиси Исмоили Сомонӣ дар майдони Дӯстӣ ҷой дода шуда, онро бо 12 ҳазор бозича оро хоҳанд дод. Ба гуфтаи шаҳрдорӣ, арчаи Душанбе низ бояд то 10 декабр омода бошад.
