ДУШАНБЕ, 4 дек — Sputnik. Раиси вилояти Суғд Раҷаббой Аҳмадзода 2 декабр, рӯзи якшанбе аз бозори "Панҷшанбе"-и шаҳри Хуҷанд ва масҷиди марказии Шайх Муслиҳиддан боздид кардааст. Дар ин бора дафтари матбуоти Ҳукумати вилояти Суғд хабар медиҳад.
Бино бар иттилои манбаъ, ҳангоми боздиди раиси вилоят аз бозор маълум шудааст, ки "дар “Панҷшанбе” маҳсулот фаровон буда, як килограм гӯшти гов 38 сомонӣ, помидор 7 сомонӣ, бодиринг 8 сомонӣ, биринҷ 6 сомонӣ, сабзӣ 1 сомониву 30 дирам то 1 сомониву 80 дирам, пиёз 70 дирам – 1 сомонӣ, ангур 6 сомонӣ арзиш доранд."
"Бозор оинаи шаҳр аст бояд онро ороста ва зебо нигоҳ дошт", - изҳор доштааст Аҳмадзода ва афзудааст, ки фурӯшандаҳо дар арафаи Соли нав нархҳоро боло набардоранд.
Раиси вилояти Суғд ҳангоми боздид аз масҷиди марказии Хуҷанд Шайх Муслиҳиддин супориш додааст, ки атрофи ибодатгоҳ обод карда шавад.
Ёдрас мешавем, пештар хабар дода шуд, ки "раиси вилояти Суғд рӯзҳои истироҳатро дар кор мегузаронад". Раиси вилоят аз ду шаҳр боздид карда, бо рафти корҳои ободонӣ шинос шуда буд. Якшанбеи дигар Раҷаббой Аҳмадзода ба деҳқонони пахтачин кӯмак карда буд.
