ДУШАНБЕ, 3 окт — Sputnik. Вазорати умури дохилаи Тоҷикистон дар якҷоягӣ бо Вазорати маориф ва илм дар Донишгоҳи омӯзгории Тоҷикистон дар ноҳияи Рашт рейду санҷишҳои мақсаднок баргузор намуд, хабар медиҳад вебгоҳи ВУД.
Манбаъ менависад, рейди милисаҳо дар донишгоҳ чанд камбудӣ, аз ҷумла вайрон намудани тартиботи дохилии донишгоҳро ошкор намуд. Ҳамчунин хобгоҳ ва ошхонаи донишҷӯён дар ҳолати ғайрисанитарӣ қарор доштааст.
"Ҳолатҳои бо ришҳои расида, мӯйҳои сари дарозу бетартиб, либосҳои ғайритавсиявӣ ҳозир гардидани донишҷӯён ба дарс ба назар мерасад. Новобаста аз он ки донишҷӯён дар хобгоҳи донишкада истиқомат доранд, вале шиносномаҳояшон ба қайд гузошта нашудааст. Ҳолати санитарии ошхонаи Донишкадаи омӯзгории Тоҷикистон дар ноҳияи Рашт ва атрофии он низ дар ҳолати ғайрисанитарӣ қарор доранд", - тавзеҳ медиҳад дафтари матбуотии ВУД.
Вазорат вфзудааст, рейд камбудии масъулини донишгоҳро низ ошкор кард.
"Аз ҷониби масъулин оддитарин қоидаҳои бехатарӣ аз сӯхтор риоя нагардида, симҳои барқгузаранда дар ҳолати ногувор қарор доранд", - таъкид намудааст ниҳод.
Ёдрас мешавем, вуруди донишҷӯён ба донишгоҳҳои Тоҷикистон бо риш, ҳиҷоб ва мӯйсари дароз (барои ҷавонписарон -идора) мамнӯъ аст.
