ДУШАНБЕ, 20 авг — Sputnik. Тибқи иттилои ФИФА, Тоҷикистон дар раддабандии моҳи июн дар зинаи 119 қарор гирифта, дар раддабандии моҳи август як зинаро аз даст дод.
Дар мавриди далели нашр нашудани раддабандӣ барои моҳи июл масъулини ФИФА изҳор доштанд, ки дар ин моҳ шеваи нави раддабандӣ коркарду татбиқ шудааст.
Бар асоси шеваи нав, ки гуфта мешавад, нисбатан мунсифона мебошад, аҳамияти бозиҳо ба назар гирифта мешавад ва ба натиҷаи бозиҳои дӯстона аҳамияти зиёд дода намешавад.
Беҳтарин нишондоди Тоҷикистон дар раддабандии ФИФА моҳи июли соли 2013 — 106-ум ва бадтарин соли 2003-180-ум сабт шудааст.
Дар раддабандии ҷадиди ФИФА Фаронса 6 зина пеш рафта, ҷои якум гирифт. Белгия дар мақоми дуюм, Бразилия — 3, Хорватия — 4, Англия-6, Олмон — 15, Русия-49 ва Миср дар мақоми 65-ум ҷой гирифтаанд.
